قیش
بیر الینــــده شاختا، بیر الده سازاق
اوینــاداراق آتین، گلــدی قارا قیش
گئیدی آغ چوخاسین یئنه تپه، داغ
کیملری چکه جگ گؤرن دارا قیش
قورخودان تیتره ییر باغـدا آغاجلار
سورولدو سورگونه گؤزهل توراجلار
اَینی تونوک یازیــــق بو یالاواجــلار
گلهجک الینـــــدن سنین زارا قیش
یاشیل دؤشهمهسین ییغــــدی یایلار
دونـداردی سویونو داشقین بولاغلار
کسیلدی داغــلارا گئـــــدن یولاغلار
بیلممکی الینــدن، گئدیـم هارا قیش
سولـــدوردون باغلارین چیچهیین، گولون
کوسدوروردون نغمه لی، سؤزلو بولبولون
کسدیـــردین صداسین، باغـــلادین دیلین
ووردون اورهیینــــــــه چـارپـاز یـارا قیــش
شاختان شاپالاقــــلا، قیزاردیر اوزه
آمانسیز قاسیرغان کور ائــدیر گؤزو
قارلا دولـــدوروبسان درهنــی، دوزو
نه دئییم سنین تک ظولمو کارا قیش
توتوبسان کوتلـــهنین قانین شوشهیه
سالیبسان چوخلارین یورغان ، دؤشهیه
عؤمـرونون شوشهسی کاش داشا دهیه
ایتیلیب، باتاسان گـوردان ـ گورا قیش
گؤرهمکی، پـوزولـوب قورقو، بوساتین
سالیبــــدی نالینــــی یـوگـورهک آتین
آلیبسان گـونشدن اؤلـومـو ساتیـــن
گوموبسان گَدیکـــــده دار مزارا قیش
اوندا یئـــــرین آلار آرزی، دیلکلـــــــر
آچیلار غصهلی، توتقون اورهکلــــــر
باشلانار یاشاییش، گولر بهبهکلـــــــر
باخیشلار اوزانار ایلـــــک باهارا قیش
