اولن من اولدیم / دکتر داشقین
سن ده پای اولارسان بیر گون بیرینه
یاران منیم کیمی دوشر درینه
اونوتما ، او گونکو گوروش یئرینه
گلمه ین سن اولدون ،گلن من اولدوم
من سنی تاپاندا ایتیردم اگر
ایتیریم گولوشون کونلومه یئتر
اورتاق دردیمیزی هم ده برابر
بولمه ین سن اولدون ،بولن من اولدوم
من یورغون بیر اصلان ،داغلار یوواسی
سن کیچیک بیر مارال جئیران بالاسی
اوره ییم آغریدان قابارچالاسی
بیلمه ین سن اولدون ،بیلن من اولدوم
داغانیق گورورسن منده هر زادی
گولورسن اوزون گول گولدورمه یادی
یاش گوزلریمیزدن بیر شیریلدادی
سیلمه ین سن اولدون سیلن من اولدوم
سئوگی ساواشینا بیرجه گیریشدیک
اولوم گوزیمیزه باخیردی دیک-دیک
ای ، بوشونا قالخیشما ائتمه گیلئیلیک
اولمه ین سن اولدون،اولن من اولدیم
<
تاریخ : | 10:40 عصر | نویسنده : جانم فدای رهبر | نظر
